ചേവായൂർ :കോഴിക്കോട് സർക്കാർ ജില്ലാ ത്വക്ക് രോഗ  ആശുപത്രിയിൽ ൽ ക്യൂ സിസ്റ്റം കാര്യക്ഷമമല്ലാത്തത് ജില്ലയുടെ വിവിധ ഭാഗങ്ങളിൽ നിന്ന് വരുന്ന രോഗികൾക്കും ജീവനക്കാർക്കും ഒരുപോലെ ദുരിതമുണ്ടാക്കുന്നു. നിലവിൽ ഉണ്ടായിരുന്ന സംവിധാനം പണി മുടക്കിയപ്പോൾ അത് മാറ്റി സ്ഥാപിക്കാൻ അധികൃതർ മുൻ കൈ എടുക്കാത്തത് ആണ് രോഗികളെ പ്രയാസപ്പെടുത്തുന്നത്.രോഗികൾക്ക് ഒപി ടിക്കറ്റ് നൽകുമ്പോൾ ടോക്കൺ നമ്പർ എഴുതി നൽകുന്നുണ്ടെങ്കിലും ശരിയായ രീതിയിൽ ക്യൂ സംവിധാനം നടപ്പിലാക്കാൻ ആവശ്യമായ ഇലക്ട്രോണിക് ക്യൂ മാനേജ്മെന്റ് സിസ്റ്റം ഇല്ലാത്തതിനാൽ വരിയിൽ മണിക്കൂറുകളോളം കാത്തുനിൽക്കേണ്ടി വരുന്ന രോഗികൾക്ക് ഇത് വലിയ ബുദ്ധിമുട്ടാണ് സൃഷ്ടിക്കുന്നത്. പ്രായമായവരും അവശതയുള്ളവരുമായ രോഗികൾക്ക് തറയിലിരുന്ന് പോലും കാത്തിരിക്കേണ്ട അവസ്ഥയാണ് പലപ്പോഴും. ഇത് ചികിത്സ വൈകാനും രോഗം മൂർച്ഛിക്കാനും കാരണമാകുന്നു.


അതേസമയം, ക്യൂ സിസ്റ്റം ഇല്ലാത്തത് ജീവനക്കാരുടെ ജോലിഭാരം വർദ്ധിപ്പിക്കുന്നു. ഒരേ സമയം നിരവധി രോഗികൾ എത്തുന്നതോടെ രോഗികൾ  തമ്മിൽ തർക്കങ്ങൾക്കും ജീവനക്കാർ രോഗികളോടുള്ള മോശം പെരുമാറ്റത്തിനും ഇടയാക്കിയേക്കാം. കൃത്യമായ ഒരു ക്യൂ സംവിധാനം ഇല്ലാത്തതുകൊണ്ട് ഓരോ വിഭാഗത്തിലും എത്ര രോഗികൾ കാത്തിരിക്കുന്നു എന്ന് അറിയാൻ സാധിക്കാതെ വരുന്നു. ഇത് കൂടുതൽ ജീവനക്കാരെ ആവശ്യമായി വരുന്നതിനും കാര്യക്ഷമത കുറയുന്നതിനും കാരണമാകുന്നു.
ഈ സാഹചര്യത്തിൽ, സർക്കാർ ത്വക്ക് രോഗ ആശുപത്രിയിൽ എത്രയും പെട്ടെന്ന് കാര്യക്ഷമമായ ക്യൂ സിസ്റ്റം സ്ഥാപിക്കേണ്ടത് അത്യാവശ്യമാണ്. 

രോഗികളുടെ ക്യൂ സംവിധാനം കൂടി മെച്ചപ്പെടുത്താൻ നടപ്പിലാക്കിയ 'ഇ ഹെൽത്ത്‌' സംവിധാനത്തിൽ ഈ ആശുപത്രി ഉൾപ്പെടുത്തി ദൂരെ നിന്ന് വരുന്ന രോഗികൾക്ക് മുൻകൂട്ടി ബുക്ക് ചെയ്തു   പോർട്ടൽ  വഴി ലഭിക്കുന്ന  സമയത്ത് ആശുപത്രിയിൽ എത്തുവാനും എളുപ്പത്തിൽ ഡോക്ടറെ കാണുവാനും സാധിക്കും.


ടോക്കൺ സംവിധാനം, ഓൺലൈൻ രജിസ്ട്രേഷൻ, ഡിജിറ്റൽ ഡിസ്പ്ലേ ബോർഡുകൾ തുടങ്ങിയ ആധുനിക സംവിധാനങ്ങൾ ഉപയോഗിച്ച് ക്യൂ കൂടുതൽ എളുപ്പവും കാര്യക്ഷമവുമാക്കാൻ സാധിക്കും. ഇത് രോഗികൾക്ക് അവരുടെ ഊഴം എപ്പോൾ വരുമെന്ന് അറിയാനും അതിനനുസരിച്ച് മറ്റ് കാര്യങ്ങൾ ചെയ്യാനും സഹായിക്കും. അതുപോലെ,ഇത് ഡോക്ടർ മാർ അടക്കം ഉള്ള ജീവനക്കാർക്ക് കൂടുതൽ സംഘടിതമായി ജോലി ചെയ്യാനും ഓരോ രോഗിക്കും ആവശ്യമായ ശ്രദ്ധ നൽകാനും സാധിക്കും.

ആരോഗ്യ വകുപ്പ് അധികൃതർ ഈ വിഷയത്തിൽ അടിയന്തരമായി ഇടപെട്ട്  സുസ്ഥിരമായ ക്യൂ സിസ്റ്റം സ്ഥാപിക്കാൻ നടപടി സ്വീകരിക്കണമെന്ന് രോഗികളും ജീവനക്കാരും ഒരേപോലെ അഭ്യർത്ഥിക്കുന്നു. മെച്ചപ്പെട്ട ഒരു ക്യൂ സംവിധാനം സർക്കാർ ആശുപത്രികളുടെ കാര്യക്ഷമത വർദ്ധിപ്പിക്കുകയും രോഗികൾക്ക് കൂടുതൽ മെച്ചപ്പെട്ട ചികിത്സ ലഭ്യമാക്കുകയും ചെയ്യും എന്നതിൽ സംശയമില്ല.ഇത് പ്രയാസത്തിൻ മേൽ പ്രയാസം ഒഴിവാക്കാൻ രോഗികൾക്ക്  സഹായകമാവും. ഒരുപാട് രോഗികൾക്ക് ആശ്വാസമായി  ഈ ആശുപത്രി അതിന്റെ പഴയകാല പ്രതാപത്തിലേക്ക് തിരിച്ചുകൊണ്ടുവരുവാൻ സർക്കാർ മുൻകൈയെടുക്കും എന്ന് പ്രതീക്ഷിക്കുന്നു.