കുവൈത്ത് സിറ്റി : റമദാനിൽ എല്ലാത്തരം സംഭാവന ശേഖരണങ്ങളും നിരോധിച്ച് കുവൈത്ത് സാമൂഹിക കാര്യ മന്ത്രാലയം. കൂടാതെ, ജീവകാരുണ്യ സംഘടനകൾ ഇലക്ട്രോണിക് പേയ്‌മെന്റ് രീതികൾ ഉപയോഗിക്കണമെന്നും മന്ത്രാലയം ആവശ്യപ്പെട്ടു.
രജിസ്റ്റർ ചെയ്ത ചാരിറ്റബിൾ സൊസൈറ്റികൾക്ക് നൽകിയിട്ടുള്ള സർക്കുലറിൽ, പുണ്യമാസത്തിനായുള്ള ധനസമാഹരണ പ്രവർത്തനങ്ങളെ നിയന്ത്രിക്കുന്ന 14 നിയന്ത്രണങ്ങളും ആവശ്യകതകളും ഉൾപ്പെടുത്തിയിട്ടുണ്ട്.
പുതിയ നിയമ പ്രകാരം, കെ-നെറ്റ് സേവനങ്ങൾ, ഓൺലൈൻ പ്ലാറ്റ്‌ഫോമുകൾ, ബാങ്ക് ഡിഡക്ഷനുകൾ, സ്മാർട്ട്‌ഫോൺ ആപ്ലിക്കേഷനുകൾ, ഇലക്ട്രോണിക് കളക്ഷൻ ഉപകരണങ്ങൾ, ടെലികോം കമ്പനികളുടെ ടെക്സ്റ്റ് മെസേജ് സേവനങ്ങൾ എന്നിങ്ങനെ ലൈസൻസുള്ള ഇലക്ട്രോണിക് ചാനലുകൾ വഴി മാത്രമേ സംഭാവനകൾ ശേഖരിക്കാൻ സാധിക്കു. ചാരിറ്റികൾ അവരുടെ ആസ്ഥാനത്തോ പൊതു ഇടങ്ങളിലോ പണം സ്വീകരിക്കുന്നത് നിരോധിച്ചിട്ടുണ്ട്.
മുൻകൂർ അനുമതിയില്ലാതെ ഷോപ്പിംഗ് മാളുകൾ, പൊതു സ്ഥലങ്ങൾ എന്നിവിടങ്ങളിൽ നിന്ന് ധനസമാഹരണം നടത്തുന്നത് സർക്കുലർ നിരോധിച്ചിട്ടുണ്ട്. അതേസമയം, പള്ളികൾ നിയുക്ത സംഭാവന ശേഖരണ കേന്ദ്രങ്ങളായി തുടരും, എന്നാൽ ചാരിറ്റികൾ എൻഡോവ്‌മെന്റ്‌സ് ആൻഡ് ഇസ്ലാമിക് അഫയേഴ്‌സ് മന്ത്രാലയം നിശ്ചയിച്ചിട്ടുള്ള ഷെഡ്യൂൾ പാലിക്കേണ്ടതുണ്ട്.
വിദേശ സംഭാവനകൾ സംബന്ധിച്ച നിയന്ത്രണങ്ങളും മന്ത്രാലയം കർശനമാക്കി. കുവൈത്തിലെ പബ്ലിക് ബെനിഫിറ്റ് അസോസിയേഷൻ നിയമ പ്രകാരം വിദേശത്ത് നിന്ന് സ്വീകരിക്കുന്ന ഏതൊരു സംഭാവനയ്ക്കും മുൻകൂർ അനുമതി ആവശ്യമാണ്. മന്ത്രാലയത്തിൻ്റെ അംഗീകൃത ബാങ്ക് അക്കൗണ്ടുകളിലൂടെ മാത്രമേ ചാരിറ്റികൾ ഫണ്ട് ശേഖരിക്കാവു. ധനസമാഹരണത്തിന് ഉത്തരവാദികളായ വ്യക്തികളുടെ പേരുകൾ സമർപ്പിക്കണം, അവർക്ക് നിരീക്ഷണ ആവശ്യങ്ങൾക്കായി തിരിച്ചറിയൽ കാർഡുകൾ നൽകും.
സ്വർണം, വെള്ളി, വാഹനങ്ങൾ, അല്ലെങ്കിൽ മറ്റ് വിലപിടിപ്പുള്ള വസ്തുക്കൾ തുടങ്ങിയ പണമല്ലാത്ത സംഭാവനകൾ ഉൾപ്പെടെ എല്ലാ സംഭാവനകളും രേഖപ്പെടുത്തണം. സ്വർണ്ണം, വെള്ളി സംഭാവനകൾക്ക്, മൂല്യം പരിശോധിക്കുന്ന ഒരു വിൽപ്പന ഇൻവോയ്സ് നിർബന്ധമാണ്, അതേസമയം വാഹനങ്ങളോ ജംഗമ ആസ്തികളോ വിൽക്കുന്നതിന് മുമ്പ് മൾട്ടി-ക്വട്ടേഷൻ മൂല്യനിർണ്ണയ പ്രക്രിയക്ക് വിധേയമാക്കണം.
മന്ത്രാലയത്തിൻ്റെ അനുമതിയില്ലാതെ പള്ളികൾക്കകത്തോ പുറത്തോ അനധികൃതമായ പ്രമോഷണൽ സാമഗ്രികൾ നിരോധിക്കുന്ന കർശനമായ പരസ്യ നിയന്ത്രണങ്ങളും സർക്കുലർ ഏർപ്പെടുത്തിയിട്ടുണ്ട്. വിവിധ പ്ലാറ്റ്‌ഫോമുകളിലുടനീളമുള്ള സംഭാവന വരുമാനം, അവരുടെ പ്രവർത്തനങ്ങളുടെ അഡ്മിനിസ്ട്രേറ്റീവ് സംഗ്രഹം എന്നിവ വെളിപ്പെടുത്തിക്കൊണ്ട് റമദാൻ അവസാനിച്ച് ഒരു മാസത്തിനുള്ളിൽ ചാരിറ്റികൾ വിശദമായ സാമ്പത്തിക റിപ്പോർട്ട് സമർപ്പിക്കണമെന്നും സർക്കുലറിൽ പറയുന്നു.
____________________
നിങ്ങളുടെ നാട്ടിലെ നേരുള്ള വാർത്തകൾ നേരത്തെ അറിയാൻ ഈ ലിങ്കിൽ കയറി നിങ്ങളുടെ ജില്ല ക്ലിക്ക് ചെയ്ത് വാട്സ്ആപ്പ് ഗ്രൂപ്പിൽ അംഗമാകൂ...!!
------------------------------------------------------------------------------------------------
